U d Züri-Versicherig übernimmt d Füürwehr, u we’s itz brönnt bi eim, de überchunnt me ne Choschtevoraaschlag u cha säuber entscheide, öb sech’s no lohnt, la z lösche. U Price Waterhouse Coopers liquidiert d Stüürämter, u d Scientologen übernäme d Proteschtanten u d Nöiaposchtole d Katholike. So chunnt naadisnaa Bewegig i di verchruschtete Strukture vo Politik, Wirtschaft u Gseuschaft i däm Land.

U de schlat d Economiesuisse vor, o no ds Wasser z privatisiere, u das macht me de o, u Nestlé überchunnt d Wasserkonzession. U we men itz Spaghetti wott mache, de choschtet ds Spaghettiwasser es Zwänzgi. U we me sech wott wäsche, de choschtet’s je nach Grössi zwüscheme Zähni umene Franke. E Söigling cha men auso fasch gratis wäsche – das zeigt, wi soziau üsi nöji freji Marktwirtschaft isch. Ds Dusche choschtet eis füfzg, das verma me no, aber we men au Tag wott bade, de mues men ufpasse, dass me sech mit dr Zyt nid z arme Tage badet.

We me ne Thunerseefisch isst, zaut me ne Wasserzueschlag vo drei Franken a d Wasserverwautig Thun AG, e hundertprozäntigi Tochter vo Nestlé, börsekotiert, u we me zäh Akzie het, de längt’s grad, für mit dr Dividände dr Wasserzueschlag für nes Dotze Fischli z zale.

U itz chunnt e jungdynamischen Ökonomieprofässer vor Uni Bärn uf d Idee, mi chönnt o no d Luft privatisiere, u o das macht me de, u d Luftkonzession geit a Meischtbietend, u das isch wider Nestlé. U de choschtet e Schnuuf Luft 0,0002 Rappe, das isch zwar nid viiu, aber es lyret sech uuf u wird viiune de doch z viiu. U itz chunnt en innovative Jungungernämer uf d Idee, Chüefürz z verchouffe füre haub Prys, un en angere innovative Jungungernämer verchouft Elefantefürz, di sy zwar fasch so tüür wi di gwöhnlechi Luft, aber chüschtiger.

Mir gseh hie, wi i üsere nöie freie Marktwirtschaft dr Wettbewärb spiut. Derzue chunnt, dass Hunderti vo nöien Arbeitsplätz sy gschaffe worde: Fankhauser & Fankhauser Electronic, Flamatt, e hundertprozäntigi Tochter vo Johnson & Johnson Electronic, Salt Lake City, produziert di winzigen Apparätli, so gross wi Ärbsli, wo’s bruucht, für vo gwöhnlecher Luft uf Fürz umzsteue: Das Apparätli wird subkutan i d Lungen implantiert, wo’s d Luft plombiert u me de d Fürz inhaliert.

Di Fürz hei de übrigens no dr Näbeneffekt, dass d Biomasse Strom produziert u eim im Hirni obe nes Liecht ufgeit u me merkt, was das für ne soublödi Geschicht isch, won i itz da verzeut ha, soublöd, fasch no blöder aus di ganzi Privatisiererei.

Aus dem soeben erschienenen Buch Der alltägliche Wahnsinn von Heinz Däpp (Text) und Fernand Rausser (Cartoons), Wegwarte Verlag, Bolligen