D Covid19-Impfig cha Nebenwürkige ha

 Wo dr Blocher chürzlech z Florida bim Trump isch ga goufe, het ihm dä gseit, är wüss itz, warum di Corona-Süüch d Mönschheit plaagi. D EU heig das Virus gströit, für d USA, China, Ängland, d Schwyz u no paar angeri Länder i d Chnöi z zwinge. Das heig er scho lang ddänkt, het dr Blocher gseit, u wo ner wider deheim gsi isch, het er i re patriarchalische Verfüegig bestimmt, dass sech aui Amtstreger vor SVP innert zäh Tag müessi la impfe, mit em nöie Impfstoff Familia, wo d Ems Chemie produzieri u wo uf em SVP-Sekretariat z Bärn, uf dr "Wäutwuche"-Redaktion z Züri u im Läckerli Huus Basu für nume 500 Franke verabreicht wärdi. Mi mües numen einisch impfe, wiu me denn di doppleti Ration ynelöi. Für ne bescheidenen Ufprys vo 200 Franke gäb's sogar drei Ratione, so0 dass men o nie meh Gringweh überschömm.

 

Dr Blocher hätt auerdings gschyder uf Moderna oder uf Pfizer gsetzt. Die, wo sech Familia hei la sprütze, hei Näbewürkigen übercho, wo schlimmer gsi sy, aus ds Virus gsi wär. Dr Maurer isch vergässlech worde, het zum Byspiiu nümm gwüsst, wi mängs Nou e Milliarde het. Dr Bundesrat hei de beschlosse, ds Gedächtnis vom Ueli mit künschtlecher Intelligänz wider chli ufzpeppe. Uf Empfählig vom Bundesamt für Gsundheit zeut dr Maurer au Morge zwänzg Tröpfli Algorithme i d Chloschterfrou Melissegeischt, won er nimmt, für nid gäng wider kä Luscht z ha. Bim Köppel happeret’s mit em Glychgwicht. Es schrysst ne gäng wider ganz nach rächts aben u de chan er aube fasch nümm ufstah. D Martullo-Blocher pääget i d Wäut use, dr Berset syg e Diktator, u hüület’s z Nacht o no i ds Chüssi yne. Dr Glarner isch uf em linggen Oug erblindet, gseht aber uf em rächten um siben Eggen umen uf di Heerschare vo asyusuechende Soziauschmarotzer u geit wi dr Winkuried bi Sempach uf se loos. Em Aeschi het’s d Stimm verschlage, aber d Fraktion versteit nen o, wen er nüüt seit. Wen er no chönnt rede, würd er säge, was er scho gäng gseit het u aune scho lang zum Haus us hanget.

 

Dr Parmelin het sech nid la impfe. Är süüffelet statt dessen au Mittag u au Aabe es Haubeli Chasselas vom Gänfersee. Är weis, dass ds Peschtizid i däm Wy jedes Virus subito wägputzt.

 

 

    

 

Chlyni Umfrag zur Konzärnverantwortigs-Initiative

Üsi Chärnchraftwärk sy tubelisicher, seit dr Röbi Gröbeli

Dr Röbi Gröbeli vo Take it easy Communication het vor Economiesuisse en intressanten Uftrag übercho: Är söu am Schwyzer Vouk klar mache, dass d Chärnchraftwärk glych gäng no di umwäutfründlechschte, sicherschte u günschtigschten Energiequeue sy.

 

«Üsi Chärnchraftwärk», seit dr Gröbeli, «sy Schwyzer Qualität: wasserdicht, stosssicher, antimagnetisch. Derzue chunnt, dass bi üüs nid glaueret wird. Z Fukuschima – statt dass si d Lehren us Tschernobyl, wo glaueret worden isch, zoge hätte, hei si o d Fukuschima glaueret. Bi üüs hingäge wird nid glaueret u drum sy üsi Chärnchraftwärk sicher, tubelisicher sogar, u we de glych mau öppis sött passiere, was aber gar nid müglech isch, wiu üsi Chärnchraftwärk tubelisicher sy, we de glych mau öppis sött passiere, de nähmet dihr so nes Jodtablettli u d Schiuddrüese blybt nech erhauten, u di Schiuddrüese evoluzioniert mit dr Zyt wider zum ene ganze Mönsch.»

 

«Säubverständlech», seit dr Gröbeli wyter, «säubverständlich sy o miir vor Economiesuisse füren Usstiig, aber nid scho itz, itz müessen üsi Stromkonzärne noch chli amortisieren u di Chärnchraftwärk sötten o no chli räntieren. Usstyge chöi de vilech d Urgrossching vo üsne Grossching, we üsi Grossching überhoupt no Ching überchöme – hüttzutags, wo mer mit em Schlimmschte müesse rächne wäg däm Choledioxyd, wo d Ärde naa dys naa zur Höu laat la wärde. Wär für d Umwäut isch, isch für d Chärnchraft! O wäg däm radioaktive Ghüder müesse mer üs keni Sorge mache. D Mönschheit wird gäng gschyder, u so wi üsi Generazion d Chärnchraftwärk erfunge het, so erfinge speteri Generazione mit a Sicherheit gränzender Wahrschynlechkeit es Verfahre, wo dä radioaktiv Ghüder dekontaminiert, so dass me nen i de blaue Ghüderseck vor d Chärnchraftwärk use cha steuen oder vilech sogar mit de Chabisstorzen u den Öpfugröibschi cha komposchtiere. Hei mer doch Vertrouen i die, wo nach üüs chöme! Nid jedi Generazion mues meine, si mües aus alei mache.»

 

«U was mer o nid sötte vergässe», seit dr Gröbeli de no, «we aui Stricke rysse, de chunnt‘s im Ändeffekt uf ds Glychen usen, öb d Mönschheit ar Radioaktivität oder am Choledioxyd z Grund geit. Fyraben isch Fyrabe. Aber mir wei hie nid schwarzmale – mi chönnt ja o säge: Ende gut, alles gut.»

 

 

Warum het äch d SVP nid no meh verlore

 

 Vermuetlech wäge Lüt wi em Housi Haueter vo Hingerwaudwyu. Dr Housi het scho gäng SVP gwääut. O dr Vatter u dr Grossvatter u dr Urgrossvatter vom Housi hei scho gäng SVP gwääut. Ds Hingerwaudwyu hocke sibe Hächle vor SVP im Gmeindrat. Mi luegt nid über d Gmeind use u weis drum o nid, dass es no angeri Parteie git.

 

Einisch a mene Sunntigmorgen im letschte Novämber, wo dr Housi mit em Bäri, sym Bärner Senn, i ds Wiudsouwäudli isch ga loufe, trifft er d Heidle Heierli, wo mit em Waudeli, ihrem Daggeli, ungerwägs isch. U wiu d Hüng enang beschnuppere, chöme d Mönschen i ds Gspräch mitenang u reden über d Hüng, u we de über d Hüng aus gseit isch, rede si über ds Wätter, u we de o über ds Wätter aus gseit isch, rede si no übere Bundesrat, u we de o übere Bundesrat aus gseit isch, d Hüng aber gäng no enang beschnuppere, fragt d Heidle dr Housi, was er de o gwääut heig, letschthin bi de Wahle, u dr Housi seit, dänk SVP, was de süsch. U d Heidle seit, si heig lang überleit, öb si di Rote söu wählen oder di Grüene, u de heig si haub rot u haub grüen gwääut, aber nume Froue.

 

Öb me nöierdings itz o Froue chönn wähle, fragt dr Housi, u d Heidlen antwortet, ja sit 1971, u dr Housi meint, wen er das gwüsst hätt, hätt er äuä o ne Frou gwääut oder vilech sogar zwo, wo chli aaständig usgsäche. U de wott dr Housi no wüsse, öb’s de o no angeri Parteie gäb ussert dr SVP, u d Heidle seit, ja, e ganzi Zylete, d Schwyz syg schliesslech e Demokratie.

 

U itz seit dr Housi, wen er gwüsst hätt, dass es no angeri Parteie gäb, hätt er ganz sicher en angeri Partei gwääut. Di SVP mit ihrne Milliardären ar Sprütze, wo d Wähler für dumm verchoufi u gäg ihri eigeten Inträsse manipulieri, di hureschyss SVP göng ihm scho lang uf ds Gäder.