Gygax Fredu het sy Sach gmacht für d Partei: 1952 i d Sektion Nord yträte, vo 53 bis 57 Vertrouenslüte-Obmaa, 58 i Sektionsvorstand gwääut, vo 60 bis 69 Sektionspresidänt, vo 71 bis 78 Mitglied vor Schueukomission Breitfäud, vo 83 bis 91 im Vorstand vor stedtische Gsamtpartei, im 95 OK -Presidänt vom Satus-Jubiläumsturnier, dört e churzi, aber viiubeachteti Red ghaute über Sport u Politik, 96 i Stadtrat nachegrütscht, 2001 zrüggträtte, für a re Frou Platz z mache, 2013 di verdienti Ernennig zum Ehremitglied vor Sektion Nord. Siderhär gäng no a jedere Sektionsversammlig derby.

U itz fröit sech Gygax Fredu, dass scho gly wider 1. Mei isch. Für ihn chönnt au Monet 1. Mei sy. Am 1. Mei, da gseht me di aute Genosse, wo me sit em letschten 1. Mei nümm gseh het, u si wärde gäng euter, di aute Genosse, un es wird eim am 1. Mei so richtig bewusst, wi d Zyt vergeit. U we de uf em Bundesplatz dr zwöit Redner gredt het, mues Gygax ga bisle, u de geit er i ds Fédéral, u dört trifft er Salchli Fritz, wo scho nach em erschte Redner het müesse ga bisle, u wiu Salchli vor eme Zwöierli Fendent hocket, bsteue si es Haubeli Fendant – das isch Solidarität im Autag.

U de rede si über di aute Zyten u wi das no viiu kämpferischer gsi syg, auben am 1. Mei. U Salchli meint, es gäb hütt eifach z viiu gschydi Rychi ir Partei, di dummen Arme göngi aui zur SVP. U Gygax meint, da syge d Achtesächzger tschoud, dene hätt me nid so viiu Uslouf söue laa ir Partei, di sygen uf em Marsch dür d Inschtitutione vo gschyden Arme zu dumme Ryche worde, u d Secondos vo dene, das sygen itz äbe di gschyde Rychen u drum syg d Partei nümm so kämpferisch wi früecher. U glychwou, meint Salchli, göng’s mit dr Partei gäng wider obsi, we’s nidsi ggange syg, u das syg d Houptsach. U Grimm Röbu heig o nume mit Wasser kochet, u d Böim sygen o denn nid i Himu gwachse. U de bsteue si no ne Haube, für uf d Partei aazstosse – aber vorhär göh si no rasch ga bisle.

Choschtprob us em Buech «Es isch nümm wi aube», in der 2. Auflage jetzt mit CD, Fr. 39.–